Unibersidat y esdebenidero

Néstor Carramiñana (Unibersidá Coleutibo Aragonesista)

(11/11/2009)  

Xs chobens somos una d´as armiellas febles d´a soziedat. Somos aborrezius/das con o seutor interpresarial que mos trata como mercanzía barata t´a suya total y absoluta disposizión. Cansxs con a unibersidat que ye fendo-se un lucratibo y elitista negozio. Fartxs con uns gubiernos que diya a diya innoran cada begada més as nuestras nezesidaz més basicas, zentradose en mantener contentos a qui més les calga pulitica y economicamente.

 

Xs unibersitarixs somos sofrindo y sofriremos con o enanto conoxiu como Bolonia. A Unión Europea y o estau espanyol han ubierto a calzón quitau as puertas d´a nuestra unibersidat t´as multinazionals ta la suya pribatización. Son premitindo que fiquen a man en o que se ba a estudear y escorquitar y como fer-lo, con unos intreses mercantilistas muy claros. An podrán amugar o lumero de plazas disponibles en cada nuebo grado y/u a suya simpla disparixión seguntes a estratexia y planificazión de negozio que mes les calga.

A Unibersidat de Zaragoza a trabés d´o Gubierno Aragonés, empentando as becas-amprén consiguirá licenziaus con una ipoteca en as suyas espaldas antis sisquiera de trobar o suyo primer emplego. Un camín totalmen concarau t´a unibersidat publica y con igualdat de oportunidaz que Aragón amenista.

 

Dende unos meses entadezaga se ye charrando d´o fenomén d´xs “chobens ni-ni”: chobens que ni estudean ni treballan. Per parti de ciertos meyos de comunicazión y belunos seutors d´a sociedat les ha resultau muy fázil calificar ista aizión como a clara degradazión d´una mozardalla galbana y egoista que han teniu tot en a bida sin dengún esfuerzo.

 

Pero no ye que no queramos treballar, ye que no podemos tener un treballo estable. Remataus os nuestros estudeos -ya sigan unibersitarios o no- ¿qué mena de proyeuto minimament illusionán de vida y/u laboral podemos trobar en treballos mal bosaus y de corta durazión? ¿Nos fan un fabor per treballar tanimientres uns determinaus meses y no recullir un trato y una retribuzión alcorde per a labor lebada a fin, chustificando-nos que ye parti d´a nuestra formazión?

 

¿Qué perspectiba debemos tener xs unibersitarixs cuan beyemos ista ambiesta? Si chuntamos isto con una unibersidat an as cabezas beyibles ban a ser as grans interpresas que ban a enfilar-nos y controlar os nuestros estudeos y futuro laboral ¿qué nos queda?

 

Nos queda o lechítimo dreito de manifestar a nuestra rebuyada y critica t´o sistema sozio -economico capitalista que premite y fomenta ista setugazión. A luita a un sistema que debamposa os benefezios d´una elite pulitica-economica antis d´o güempasar d´a sociedat.
A resistenzia a un libre mercau inchusto, especulador y corrupto que mos trata como mera mercanzía. Chenero bendible con el que se puede chugar, estriboquiar y rebuyar cuan més combenién les siga.

 

Ista no ye a unibersidat ni a sociedad que queremos. Toda persona tien o dreito de aczeder a una educazión publica, de gufanya y de calidat. Siga cual siga a suya bocazión, sin importar que ta ciertos interpresaires les siga més o menos rentable. Toda aizión y ecsprisión cultural ye enriquezedora, amenista promozión y una dentrada de gufanya.

Pensamos que iste ye un aspecto alazetal ta obtener a sociedat libre, solidaria y chusta que deseyamos y amenistamos.

 

Comentarios: 26