La mortalla de lanuza

Oscar Lerín Gabás

(16/12/2009)  

Oficialmén, el nacionalismo espanyol no existe. Existen patriotas constitucionals, patriotas constitucionals d´una patria indivisible, en la que l´exercito garantiza la suya unidat. Pero nacionalistas, nacionalistas no, que quede claro. Estes no nacionalistas (dicen els), siempre son, ironías de la vida, es que portan las banderas más grans (en ixo igual PSOE que PP). Exemplos varios i hai: en La Corunya cuan yera alcalde Francisco Vázquez (del PSOE), metió una bandera graniza d´Espanya en la ciudat. Cosa parellana fayó Aznar en Madrit, metendo una bandera espanyola de dimensions colosals. Alavez, el PSOE que yera en la oposicion se queixaba que se fese ixo (pero en reyalidat el feban, no perque les parixese mal,si que per una estratechia electoral "mirar que fachillas son estes del PP, no como nusatros que somos guais...")... En Zaragoza es del PSOE han feto el mesmo que en Madrit fayó Aznar; meter un banderón colosal en la ciudat. Pero aquí ye distinto, perque de toda la ciudat, l´han teniu que meter en un puesto que ye singular; en la plaza dedicada a Aragón, chunto al monumento a una persona que murió decapitada per defender la soberanía del reino d´Aragón. A diferencia de Madrit, aquí se metió en un puesto que tamponaba frontalmén contra un simbolo territorial, contra el simbolo de l´aragonesismo. Es que vivien l´acto, aprecién (al menos yo) el momento, como una demostración de fuerza (ye fácil fer ixas demostracions con es debils, fer-lo con es debils ye tamién muestra de cobardía), con l´exercito espanyol desfilando per las carreras de Zaragoza, y colocando el banderón como sinyal de conquista. Deván de momentos asinas, d´humillación colectiva, un se siente pisoteau, y mira de defender-se como puede. Asinas, que con ixa ideya, la ideya de reparar la humillación a un simbolo del pasau nacional d´Aragón, i vayé ta´l Chusticia d´Aragón. Dita institución aceptó la mía queixa (cosa que no tenebe guaire claro), y nimbió una socherencia ta´l concello de Zaragoza, en la que se pediba como la millor opción que el banderón estiese trasladau ta un atro puesto. Si no se feba esto, se pediba que hese igualdat en el tratamiento a es simbolos (entre la bandera espanyola y l´aragonesa). El concello de Zaragoza aceptó la socherencia (la segunda opcion, que no ye la millor, pero al menos igualdat de trato), asinas se me comunicaba a yo, decindo amás que la Diputación Cheneral, heba feto entrega ya de la bandera aragonesa... Ixo se me deciba en chuliol, pero sen cuasi en navidat, y encara continan las cosas igual. Al vier que en la practica no heban feto cosa, i torné a ir ta´l Chusticia, qui en una carta me contestó que mirara, en lo posible, que se cumpla la socherencia. Dentro de pocos días, un Lanuza amortallau en una colosal bandera espanyola, recibirá un homenache, y talmén parlén d´esto.

 

Ta rematar diré que la función de l´actual institución del Chusticia d´Aragón, sirve d´espiello a la calidat de la democracia que tenén. Cuan una administración no contesta al Chusticia, como tiene que fer per lei, no ye so que faltando a la lei, y a la institución, sique al faltar a qui veila per es dretos d´es ciudadans, ye faltando a la propia esencia de la democracia. Esta vez el concello de Zaragoza ha constatau, y ha aceptau la socherencia (cosa que no tiene per que fer si crei que ista no tiene razón), pero pareix que l´ha feto más ta que pueda reinar el silencio,que per voluntat reyal de cumplir-la. Cosa que no entiendo, si no´l vas a fer, no aceptes la socherencia, argumenta el tuyo "no" y prou. Decir; "si si...y pensar no, no l´in a fer, ye ta que se callen" ye una falta de respeto.

Comentarios: 0