info: Fendo Orella

O diya 16 d’abiento de 2009 estió chuzgau en Zaragoza o nuestro compañero Alvaro, acusau d’aber fotiu un cantalazo a un auto d’a Polizía Local o diya 30 de Mayo de 2008, en o bico de Torrero, an yera dende feba más de dos añadas o Zentro Sozial Okupau “Rasmia” y que bi estió desaloixau ixe mesmo diya dentre un granizo espliegue polizial. Fa bels diyas conoixébanos a sentenzia y ayer, diya 26 de chenero de 2010, Heraldo de Aragón publicaba la notizia ocupando si fa u no fa la totalidat d’a suya pachina 11, rezentando-ie tamién lo que pasó seguntes a suya ambista d’os feitos d’ixe diya de mayo. Lo que i pasó estió dimpués d’o desaloix y a retilán situazión de sitio polizial en o bico, una colla de bellas 20 u 30 personas dentre as que se i trobaba o nuestro compañero Alvaro, que eban acudiu ta fer beyer o suyo refirme a o Zentro Sozial Okupau “Rasmia”, se i trobón con un auto d’a Polizía Local y un cantalazo impactó en a finestra d’o copiloto de l’auto. Como consecuenzia d’isto, un d’os tres ocupans de l’auto presentó una ferida de 3 zentimetros en a barba. Antimás os beires d’a finestra le fazión mal en un güello pero no tien perdida d’a bista. As secuelas nomás que son a zicatriza de 3 zentimetros que le ocasiona un chicorrón prechudizio estetico. Poco dimpués d’isto, Alvaro estió identificau por a Polizia Nazional no guaire lexos d’o puesto chunto a dos zagals más. Antiparti, Alvaro no estió deteniu dica o lunes benién diya 1 de chunio en casa suya. Alvaro ye presentau como unico culpable y Heraldo de Aragón remarca terne que terne que “No bi’n ha de confabulazion”, aprezisándose a dizir cualcosa que dengún no ha demandada y que dengún no pensamos…

Seguntes Heraldo de Aragón, Alvaro ye condenau a 3 añadas de garchola y abrá d’indemnizar con 600€ a l’achén “feriu” antimás de bosar lo que costó lo beire d’a finestra, que estión 91,62€, pero dengún no les ha rezentau ni brenca ni meya ni a él ni a l’abogau suyo, ni a calendata d’ingreso en a garchola ni pon. Se ba a presentar un recurso ta l’Audienzia Probinzial ta que rebise a sentenzia porque bi ha bella error que no ha pendiu en ella os atenuans que a esfensa presentó por a suya parti.

Queremos dixar platero que:

NOS PARIXE INCHUSTIFICADA Y ESMESURADA DE TOT ISTA SENTENZIA, porque:

• A demanda d’a fiscal yera de dos añadas de garchola.
• Alvaro no’n teneba d’antecedens penals.
• O metodo d’identificazión s’alazeta so que en a parola d’os polizias, sin alportar-ie nian una preba.
• Debán d’una afronta asinas a un polizia ye imprexinable que as nuestras efiziens fuerzas de seguridat tarden tot un cabo de semana en arrestar a una persona, más que más cuan dita persona estió identificada poquet dimpués de que ocurrisen os feitos.
• Sabemos que o nuestro compañero Alvaro ye inozén ya que él no estió qui fotió ixe cantalazo.
• Nos pensamos que iste montache polizial preba d’estar un furo prezedén represibo politico en ista ziudat fendo servir a o nuestro compañero de “cabeza de turco”.

Asinas mesmo queremos esplanicar que:

• Garra sentenzia de garra chuez puede chirar a reyalidat y creyar una nueba berdat, sisquiá por muito que Heraldo de Aragón segundíe ixa mesma mentira una y zien begadas.
• Garra condena exemplificatoria, ni ista ni dengún atra, ba a reblar o nuestro esmo combatibo.
• Okupar una bibienda ta bibir-ie u un local ta autochestionar-lo ye un dreito, porque ye inadmisible que bi’n aiga milentas lasas en a nuestra ziudat y tot especulándose con ellas, y se’n fan muitas más nuebas que permaneixerán añadas buedas porque dengún no puet bosar-las, u que 9348 aragoneses/as aigan teniu que refusar BPO en as zagueras añadas por no poder bosar-las debiu a la suya larguiza, y ta beluns cutiana y perén, crisis capitalista.
• L’antigo dreito a la okupazión, ye agora dimpués de fatezas de condenas como ista, un deber moral solidario y reboluzionario.

Alvaro ha ubierto una cuenta ta qui quiera u pueda solidarizar-se economicamén:  0182 6936 10 0201525685 (BBVA)